企嶺下時光

這裡有我喜愛的, 太陽、大海、藍天與平靜..

Saturday, August 23, 2008

激情過後的晴空


昨日5時許,八哥打比鸚鵡道:「hey,friend!我係西貢滑緊浪,好過癮呀,不如改地點食飯啦」
鸚鵡帶點猶疑說「咁珠江book左張枱點呀...唉算啦,西貢就西貢啦」
就係咁,鸚鵡就係西貢海登陸左!

此時,海面上風平浪靜!

風暴過後,天空份外美麗!!!

Friday, August 22, 2008

打到黎啦


這就是9號波下的企嶺下
據說而家正橫過西貢海面,直吹新界東!!
其實...都唔係太似打到9號,事關我記得上年打唔知3號定8號時,情況仲恐怖
窗台外的樹葉呀泥麈呀唔知咩呀都被捲起,在空中打轉,
今次呢,最勁就是遠處海面的白頭浪,激起既浪好似出煙咁呀!!!

Monday, August 18, 2008

與太陽伯伯玩遊戲

星期日,陽光普照,與三名佬再戰大浪西與四媟潭,曬到成面紅bog bog都不打緊,咁先係放暑假ma!!!

呢d先叫「陽光與海灘」ma..



要上四媟潭,就要爬過這些石壁,我說是我爬,別人身手敏捷的,其實是走或小小攀過便可!上到去,你看!幾辛苦都值得的!

再真的攀登上去,就是這個小湖,你看d水清到...看見遠處有兩個人頭在游泳嗎?!

Sunday, August 17, 2008

五天精華遊

今個暑假倒不錯呢,沒有功課壓力,沒有「咩都無做過就返工」既感覺,發現了相機影「黑白」及「復古」既功能,真的很好玩,就來看看這星期的5天精華遊...

星期二
因颱風改了期的briefing終於進行了,有點不順利,先是兩名攝影師忘記了,幾位朋友要開工,而重要是,食物不好吃,真的「待慢」了,但我仍安慰身邊的,說其實限制總有,目的其實也達到。飯後的喝喝酒倒是幾enjoy呢!

它叫「gigi」(volka+pineapple juice+唔知咩),幾好飲!

黑白照令黑夜有白天既感覺


星期三
老朋友Kitty到訪,初中時「請昌」幫手縫紉,性格率真的好朋友,從那時開始,我就覺得她是artist,繞了大圈,她告訴我上年起她做了interior design,「就是你啦」我大叫好,在家談心多好,讓我又了解她多了,並發現,我和一些疑似「亞氏保加症」的人特別夾的,身邊就至少有兩個。


星期四
和姊妹試衫,不小心地被新郎拍下粗口片段,當時我只覆述攝影師忘記來時的第一個反應,怎料說得興奮時大聲了,伯母連忙望過來,還被拍下,連同早前在琪琪家被拍下飲酒後小小上腦的片段,已有兩隻痛腳在人手,怎辦...


晚上,和梁生到旺角pokka吃飯,愈來愈喜愛那裡,食物好吃,材料新鮮,價錢都ok,而最正的是,甜品!!

My favourite...咖啡凍餅+木糠布丁...令成餐飯畫上完美句號!


星期五
到訪line2新家,當然要帶備「入伙酒」慶慶佢!!又係啦,在家談心,真係傾到唔捨得走,好姊妹你話係咪!

花褲--代表著主人家既relax
花裙--代表到訪者,今天係要上戲開工


星期六
聖心聚會,今日有食神,意大利麵與pizza很好吃,然後再到pokka吃甜品!
後面的小情人就好像路人攝埋黎影相似的...


及後,在299車上,發現了威E與E芙,就和這對有趣小情人拍個照!!可愛死啦~~~

Monday, August 11, 2008

繼續運動

睇下幾大浪~~

跑步的力量的確有點神奇,定係因為著了套戲服呢?! 話說我只係跑了一次咁大把,但昨天的行山游水再攀石,發現自己比以前fit了(唔通心理作用?!),這一天,我們去了一向喜愛的大浪西灣+四媟潭。
以前用上45分鐘才走到沙灘的山路,今次只用了25分鐘,大浪西是10年前已開始去,那裡水清沙幼,因為要走山路,所以人當然比泳灘少,最可惜是昨天太陽光不多,是溫和的伯伯,幾舒服的,但就欠了些shining!~~~
浸過咸水,然後便再攀石,上去淡水的四媟潭,那裡是個小湖瀑布,有些夠膽的就在那裡跳水。
回程就最勁了,我未試過不需停又不需喝半點水,便走畢全程山路,仲要上一大段斜路,又只用了25分鐘,唔氣喘的!!

聽著自己的呼吸聲,真係...好健康啊!!!!

Friday, August 08, 2008

受唔起

好恐怖!
每次從電視畫面或報導中說北京奧運如何的盛大宏偉,如何全民鼓動,那天在香港傳火種那種強大既身份同化壓迫感,真係頂住,憋住,同想嘔,想關電視!
經過呢劑咁強勁同唔知唔覺既中共強勁思想洗禮後,暖水浸青蛙的效果就更勁了。
咩「我們就是奧運」,我幾時有攪奧運,我攪輔導嫁喎,運動會就運動會吧,沒有政治性效果就假啦,如果無呀,就唔會要咁多保安,驚死有人襲擊啦,又唔會咁多大粒人,怕得罪中共,跟住黎晒啦。
主體是宣示國力權力,不是個純粹的運動會吧。然後順道來個身份認同大計劃,統戰吧。
最恐怖的,就是這種不知不覺,大家都覺得是支持運動...但係感到好興奮,好光榮,好...
跟住有一日,「我們」會跟著說「係啦,其實動亂係要制止的,唔係邊有而家咁繁榮呀」
唔知點講,總之感覺不良好。
今晚真辛苦...

尚欠599次

昨早,我們的跑步大計起動了!
兩星期前到波鞋街置了大拿拿600元的裝備,包括一對跑鞋(有墊的),跑衫連跑褲
著起是健兒look的那款,型!
然後我決定,要跑番600次,圍起1蚊1次先可以抵番!
等了兩星期,昨早終於跑了......14分鐘!!!
嘩,已經好勁(對我),10幾年無郁過了!仲要跑西貢彎而有斜的路,跑了三個299巴士站!
雖然一停低時有點暈,(d血上唔切腦..>.<)
晚上梁生問我有無腳痛,我大大聲話「無喎」,他一句「果然後生呀」
怎料今天起身,痛到呢....
不過,我係唔會放棄仲有599次既大計既!!

Wednesday, August 06, 2008

鬧爆北冕


最衰係你呀!最衰呀!!!
兩星期前約了成廿友既大briefing會,就係你,你呀!!!
攪喎晒啦
本來諗住打風都打唔luck,照去,大人黎ma
但係呀,妹記大排擋話買唔切料呀,唔開檔呀,廿友又要傾野又要食,去得邊呀
要改期啦!!!
最衰係你呀!!!咩北冕!!!打小人呀!!!

Tuesday, August 05, 2008

黃昏kamtuelian長洲之旅

出發啦! (4:00仍在往中環渡海輪中...)

風味大排檔

薑葱蟹好好味~

回程啦


星期天,上了大陸揼骨。醉翁之意不在酒,在乎....吃羊肉!!!
我們已經幫襯了5年,但仍然係久唔久就一定上去吃一次:蒙古燒羊排、烤羊肉串、極之好味既湯鍋打邊爐,說是清湯,但湯中有大蒜大葱大薑八角呀仲有好多,總之味濃香爆,令那些菠菜腐"足"索晒d味...好味到呢....

星期一,梁生恨去沙灘游水已經好耐,今日出門已經成2點,他說要去長洲(!)對於我這個保守派,當然不太願,但放假ma,同埋,通常因為佢既堅持、勇猛同kamtuelian既態度,有時又會帶左我去另一個新體驗,好像每次去旅行,走一些沒人走的路,但上到去,又有一番新景象!

咁,入到去,已經5:15,馬上落海灘!好彩,仲好多人,好有氣氛,可惜太陽伯伯已經收左工。我去的途中發現自己今天不能下水,就坐著吹風,他就一條友和大海玩遊戲,然後他說自己好健康(哈哈...),在島中行來行去,真是別有一番寫意,買了心頭好,很便宜,然後坐在大排檔吃海鮮,熱哄哄,很風味!!好像在泰國一樣,幾有旅行feel!!!
所以,無跟錯佢既~~ 開心的一天悠閒假期!!!

說摯友




(借來的相,謝謝琪琪)
分享會後,我的暑假來臨了!
先是...一連herr足三日在家,上網打掃煮飯洗衫整結婚少少野同埋,睇電視,上年暑假睇左「14歲媽媽」,今個暑假又重播,咁...梗係又再追,睇極都咁有feeeeeeel.....

herr到星期六,終於展開一連8天既出動!!
首先,在毫無準備下,連同另一名瘋女,去左一號瘋女既新屋,是晚還有大家既另一半,真係琪琪話齋「家好月圓慶入伙」啦,是晚碰上電視做緊「港男」,大家酒上腦後就大玩擺pose snatshot,型到呢....(係騎呢到呢...)

每個階段都有那個階段既摯友,她倆就是我在這學校的好姊妹。

如vivi姐所言,我仨性格的確有異,hyper/躁狂/自閉,唔係,係一個靚女雅典娜,一個型女sex & the city,而我...就係活潑小女孩一名(你睇我地幾有年歲既鴻溝),但就因為這樣的牛河dull亂,就產生出一種特別既鑊氣,令人流連忘返,痴痴呆呆,總之就好好笑,好開心,發癲。

我的朋友不多,但很喜歡和朋友傾計。中學時期,就是因為這,我決心要做對人,如社工呀,既工作,因為我覺得人與人之間真誠既相處,係好touching的。

我很感激在我生命中和我一起渡過不同階段的朋友,如中學時的4金花,那時一起讀書考會考,last day在學校狂影造型照,如當年的鐵達尼號、停車場扮死造型,每次睇番都笑死,實在太青春!然後,是大學時期,其實在港大時,不太專心讀書,所以在social的真正好朋友只有line2,我和她又是性格X異,但又可以大笑和交心的,數數已經識了10年,有時很久很久都沒有見面/聯絡,但有事找對方,大家也會在對方身邊的。港大時,最多時間,就係拿去攪事,year 1攪「常綠林」,那班庄友又係唔見,但我會很有感覺的,因為就是一起攪野度野爭新生開沒完沒了的會議,入面有如外國番的滿口英文,有做wwf,有個PR,有個marketing,有政府的,有做婚紗事業(就是幫襯她),但聚會時,感覺就停留在那年的year1。做學生會/學聯時,幾乎停了學業,(其實真的延遲了半學期畢業),但學習及經驗到的,就最多了。學生會中太多人事及政治,連自己庄都不能太交心,最愛的就是林正。那天在法院外,幸好她走過來擁著我,才令我可以及時放聲大哭,所以每次抱著妳,都有點觸動的。另外最記得就是和她一起通頂做「六四特刊」,那時的她,就如常綠林的EV,常說「得啦」「趕到既」,咩都話得的,可能是我份人過慮及緊張,當然也是不太懂執生及變通的缺點,所以和我part的人就表現得要放鬆一點,但又因為咁,我同佢地又會很好,很friend的。林正你近來好嗎。還有在學聯認識到的一大班人,那些時光是獨特的,因為他/她們就是一起經歷上街被拉反抗砌野既一班。一輪燃燒過後,便工作了。工作,我常覺得,是難找到交心人的,幸運地,找到了兩名瘋女,令我工作時也不感到孤獨,工作時也開心多了,記得那天琪琪捉著我手說「你呀, 有咩記得要出聲呀,唔好自己屈住係下邊...」還有vivi那天在教員室,見我眼有淚光,便推開所有野,說「今晚來我家飲吧」,動感死啦。其實還有一位,她是羊婷,我想,認識她已有...中三到而家,15年吧,其實見到面既時間,應該...共不多於1個月吧,她在加拿大,但又係啦,唔知點解的,擁著她就有想哭的感覺,你話死未。

這些朋友,就是會請來晚宴的摯友。雖然大家是不同的,和我的深刻程度亦有不同,但,很感激,在我生命中出現的你們,令我的生命加多了一點,又一點,多一點,這已經很滿足了。